Verður hrikaleg spenna

Þetta verður alveg geggjaður dagur á morgun, úr því að menn reikna með að vindur og tiltölulega kalt loft verði ráðandi á vellinum í Augusta. Ég held að Tiger eigi eftir að spila mikið sóknargolf, því hann hefur í raun engu að tapa. Hann er 6 höggum á eftir efsta manni og þarf að fara á mikið flug til að ná í skottið á Immelman, sem var að spila feiknalega vel í dag.

Ég yrði hissa ef Tiger endaði á einhverju miðjumoðsskori. Annað hvort verður hann á 65 eða þar um bil, eða háum sjöunda tugnum, vegna sóknarspils. Verður fróðlegt að fylgjast með þessu allavega.

Mér fannst magnað að sjá mistökin hjá Mickelson á 16. í dag. Togaði teighöggið í glompuna hægra megin við flötina og var þar í spæleggi í niðurhalla og komst ekki nær holunni en um það bil 12 metrum (mín ágiskun) . Svo púttaði hann alveg skelfilega illa í fyrstu tilraun og fékk því þrípútt í hausinn og tvöfaldann skolla,öðru nafni Skramba. Hann er í raun dottinn úr baráttunni, því hann er orðinn 9 höggum á eftir Immelman og þarf því að rústa vallarmeti Greg Norman til að eiga minnsta möguleika á að sigra þetta.

Immelman með tveggja högga forskot